Улуустааҕы «Ааҕар кылаас» квест оонньуу

Чтение — это окошко,

через которое дети видят и познают мир и самих себя.

В. Сухомлинский

Алтынньы 2 күнүгэр Таатта улууһун историятын кэрэһэлиир Хадаайы мусуойугар улуустааҕы «Бастыҥ ааҕар кылаас» күрэх квест-оонньуу быһыытынан ыытылынна. Квест оонньуу сүрүн сыалынан үүнэр көлүөнэҕэ ааҕыы оруолун үрдэтэн, кинигэ нөҥүө оҕо төрөөбүт улууһун историятын, чулуу дьонун билэ улаатарыгар туһуланна.

Улуустааҕы «Бастыҥ ааҕар кылаас» күрэҕи «Туллукчаан» оҕо библиотеката, Хадаайы музей үлэһиттэрэ, А. Е. Мординов аатынан лиссиэй учуутала Сыромятникова С. С., педагог-организатор Миронов А. А. салайааччылаах «Таатта Кэскилэ» оҕо тэрилтэтэ, оскуола педагог-библиотекардара көҕүлээн ыыттылар. Киэҥ эйгэни хабар түһүлгэ үлэтин көрүҥэ араас буолан, кыттааччылары олус сонурҕатта, оҕолор кинигэттэн ылбыт билиилэрин кылгас кэм иһигэр тургутуналларыгар көрөллөрүгэр кыах бэрилиннэ.

«Төрөөбүт дойду историятынан» квест оонньууга Уус-Таатта, Уолба, Тыараһа, Дьохсоҕон, Алампа аатынан №1 оскуола, Петров Д. А. аатынан №2 оскуола, Таатта лиссиэйэ уопсайа 8 хамаанда кэлэн көхтөөхтүк кытынна.

Кыттааччылар «Дьулуур» оҕо тэрилтэтиттэн Заболоцкая Лена «Кырдьыгы таба тал», Софронова Сандра «Крокодил», Дорофеева Ариана «Ордугу бул»,  Дайбаннырова Анжелика И. В. Попов хартыыналарынан «Мозаика», Миронов А. А. «Мэтириэтинэн таайбараҥ» түһүмэхтэрин олус сэҥээрдилэр.

Күрэх түмүгэр квест оонньууга Таатта лиссиэйин 6 «а» кыл. хамаандата (сал. Турнина С. Д., Варламова А. Д., Павлова М. С.) — 1 м., Уолба хамаандата (сал. Боппосова З. П.) – 2 м., Уус Таатта хамаандата (сал. Готовцева Р. А.) – 3 м. буолар чиэскэ тигистилэр.

«Туллукчаан» оҕо библиотекататыттан Монастырева А. Е. ыыппыт викторина күрэҕэр Таатта лиссиэйин 6 «б» кыл.хамаандата (сал. Акимова А. Н., Павлова М. С.) – 1 м.,  Тыараһа хамаандата (сал. Турнина В. И.) — 2 м., Таатта лиссиэйин 6 «а» кыл.хамаандата (сал. Турнина С. Д., Варламова А. Д., Павлова М. С.) – 3 м. ыллылар.

Аахпыт айымньы туһунан тэттик суруйуу куонкуруһугар Ытык-Күөл №2 оскуола хамаандата (сал. Мочкина М. Д.) — 1м., Уус Таатта хамаандата (сал. Готовцева Р. А.) — 2 м., Таатта лиссиэйин 6б кылааһын хамаандата (сал. Акимова А. Н., Павлова М. С.) — 3м. буоллулар.

Кинигэ киэҥ билиини, өй үлэтин сайыннарар ураты айылгытын таһынан, киһи ис туруга, духуобунай баайа сайдарыгар төһүү күүстээх. Сонун хайысхалаах, билиини кэҥэтэр, төрөөбүт дойду историятыгар интэриэһи тардар тэрээһин инникитин даҕаны эйгэтэ кэҥээн, үгүс оҕону түмэ тардарыгар баҕарабыт!

Кинигэни ааҕыҥ, билиигитин кэҥэтиҥ, ис туруккутун байытан, үтүөҕэ-сырдыкка тардыһыҥ!

Таатта лиссиэйин “Триумф” эдкордара.